बानर बांको रे,

लंका नगरी में,

मच गयो हाको रे,

बानर बांको रे ॥

मात सिया यूं बोली रे बेटा,

फल खाई तू पाको रे,

इतने माही कूद्या हनुमत,

मार फदाको रे..बानर ॥

रुख उडाख पटक धरणी पर,

भोग लगाया फलों को रे,

रखवाला जब पकड़न लाग्या,

दियो झड़ाको रे..बानर ॥

राक्षसिया अडरावै सारा,

काल आ गयो म्हाको रे,

मुख पर मार पड़े मुक्के री,

फाड़े बाको रे..बानर ॥

हाथ टांग तोड़े, सिर फोड़े,

घट फोड़े ज्यू पाको रे,

लुक छिप कर कई घर में घुसग्या,

पड़ गयो फांको रे..बानर ॥

उजड़ी पड़ी अशोका वाटिका,

ज्यूं मारग सड़कों को रे,

उथल-पुथल सब करयो बगिचो,

बिगाड़यो खाको रे..बानर ॥

जाय पुकार करी रावन स्यूं,

दिन खोटो असुरां को रे,

कपि आय एक घुस्यो बाग में,

गजब लडाको रे..बानर ॥

भेज्यो अक्षय कुमार भिडन नै,

हनुमत स्यामी झांक्यो रे,

एक लात की पड़ी असुर पर,

पी गयो नाको रे..बानर ॥

धन धन रे रघुवर का प्यारा,

अतुलित बल है थांको रे,

तु हे जग में मुकुटमणि है,

सब भक्तां को रे..बानर ॥